पेम्बा गेलु शेर्पा/०७ अक्टोवर बेल्जियम

– बेल्जियमको अदालतले Meester Thijs भनेर चिनिने Thijs D. नामका ३७ वर्षीय पूर्व शिक्षकलाई कम्तीमा १६ बालबालिकामाथि यौन दुर्व्यवहार गरेको अभियोगमा १२ वर्ष कैद सजाय सुनाएको छ।
Geraardsbergen नगरको Onkerzele स्थित De Springplank विद्यालयमा कार्यरत रहँदा उनले विद्यालयकै वातावरणमा साना बालबालिकामाथि बारम्बार दुर्व्यवहार गरेका थिए। अभियोजन पक्षका अनुसार यो बेल्जियममा हालसम्मका सबैभन्दा गम्भीर बाल-यौन अपराधमध्ये एक हो।

थिस डी. विद्यालयमा ‘केयर टिचर’ (zorgleerkracht) का रूपमा कार्यरत थिए। उनी विद्यालयमा जिम्मा लिएका करिब दुईदेखि चार वर्ष उमेरका साना बालकहरूमाथि वर्षौंसम्म दुर्व्यवहार गर्ने गर्दथे। अदालतमा प्रस्तुत प्रमाणअनुसार उनले पीडित बालबालिकाको तस्बिर र भिडियो खिचेका थिए र आफ्नै कम्प्युटरमा हजारौँ अश्लील बाल–चित्रहरू सङ्ग्रह गरेका थिए। त्यसपछि उनले ती तस्बिर र भिडियो इन्टरनेटका गोप्य समूहहरूमा अन्य व्यक्तिहरूसँग बाँडेका थिए।

यो घटना अमेरिकी प्रहरीले गरेको सूचनाबाट खुलासा भएको हो। अमेरिकन अधिकारीहरूले एउटा भिडियो फेला पारेका थिए जसमा बेल्जियमको विद्यालय देखिन्थ्यो। त्यसपछि बेल्जियमको संघीय प्रहरीले अनुसन्धान थाले र ती तस्बिरहरू थिस डी. सम्म पुगेका हुन्।
उनको घरमा गरिएको छापामा प्रहरीले करिब ६,००० भन्दा बढी अवैध बाल-अश्लील तस्बिर फेला पारे। पक्राउ परेपछि उनले केही अपराध स्वीकार गरे पनि सुरुमा आफूले गरेको कामको गम्भीरता घटाएर देखाउने प्रयास गरेका थिए।

Oudenaarde स्थित आपराधिक अदालतले उनलाई १२ वर्ष कैद र ५ वर्षका लागि नागरिक अधिकार खोसिने सजाय सुनाएको छ। साथै उनलाई शिक्षा क्षेत्रमा काम गर्न निषेध गरिएको छ र पीडित परिवार तथा विद्यालयलाई करिब एक लाख १२ हजार युरो बराबरको क्षतिपूर्ति तिर्न आदेश दिइएको छ।
न्यायाधीशले फैसला सुनाउँदै भने, “सबैभन्दा असहाय र नाजुक अवस्थामा रहेका बालबालिकामाथि गरिएको यो कार्य नियोजित, निर्दयी र समाजका लागि अत्यन्त हानिकारक हो।”

पीडित बालबालिकाका अभिभावकहरूले अदालतको निर्णयलाई स्वागत गर्दै भनेका छन् कि सजायले न्याय त दिएको छ, तर सन्तानले भोगेको पीडा कहिल्यै मेटिँदैन। एक अभिभावकले भने, “हामीले हरेक दिन आफ्ना बच्चा उसकै जिम्मामा दिएका थियौं, अब त्यो विश्वास सधैंका लागि भङ्ग भएको छ।” विद्यालय De Springplankले आफूलाई नागरिक पक्ष (civil party) का रूपमा मुद्दामा सहभागी गराएको छ र भविष्यमा बालसुरक्षा र शिक्षकको पृष्ठभूमि जाँच प्रक्रियालाई अझ कडा बनाइने जनाएको छ।

यस घटनाले बेल्जियममा बालसुरक्षाको विषय पुनः केन्द्रमा ल्याएको छ। बालअधिकारकर्मी र शिक्षासँग सम्बन्धित संघसंस्थाहरूले सरकारले विद्यालय र बालसंस्थामा कडा निगरानी र मनोवैज्ञानिक सहयोग प्रणाली लागू गर्नुपर्ने माग गरेका छन्।
विशेषज्ञहरूका अनुसार यस्ता घटनाबाट बालबालिका मात्र होइन, उनका अभिभावकहरू पनि गम्भीर मानसिक प्रभावमा पर्न सक्छन्। मेस्टर थिसको मुद्दा यस कुराको गम्भीर चेतावनी हो कि विश्वासको ठाउँमै पनि सजगता, पारदर्शिता र निगरानी अनिवार्य हुनुपर्छ।